كل ما قريت كتاب
بشوفك من جفن عيني أقرب وأقرب
بشوفك ندى يلمع على الأعشاب
صوره إلاهيّه من الشمس أشلبْ
بشوفك مثل أفعى ع العشب تنسابْ
إنِ غضبتِ أهونْ عليّ قرصة العقربْ
أهون عليّ الناب يلقى النّاب
إن تركتيني أقضّي العمر أتعذّبْ !!
ما أحلى شوفتك لمّا نكون قراب
عيني ورمش عيني وصدري إلك ملعبْ
يا ريتك مديرة صفنا وأقعد مع الطلاب
تظلْ حدّك وبدروس العلم أرسبْ
ابيضْ شعري بس القلب ما شابْ
يركض وراكِ طفل عمْ يلعبْ
ويقلّك تعربشي عليّ يا شجرة اللبلابْ
تا أبقى مثل عازف ربابه أطرب  ، وأطربْ
بغيابك ناطرك تا يرجعوا الغيّابْ
أحضنك أحملكْ على ظهري لو صرتْ أحدبْ
لا تحكمي عليّ الدّهر دولاب
إللي بيستعجل بحياته كثير راح يتعبْ
ياما وياما سهرنا ع زخّة المزراب
وصوت الطبيعه لحن شو حلو ومرتّبْ
راح ظل حبّك لو غديت تراب
يتحوّل ترابي إلك أخصبْ
بترابي لو تكوني كرمه تحمل الأعنابْ
وتصيري قناني نبيذ منها أشرب وأشربْ ..........

( سحماتا)