إقلع غمالك يا تور وارفض تلف
إكسر تروس الساقية واشتم تف
قال: بس خطوة كمان.. وخطوة كمان..
يا اوصل نهاية السكة يا البير يجف
عجبي!!

يا حزين يا قمقم تحت بحر الضياع
حزين أنا زيك وإيه مستطاع
الحزن ما بقالهوش جلال يا جدع
الحزن زي البرد.. زي الصداع
عجبي!!

أعرف عيون هي الجمال والحسن
وأعرف عيون تاخذ القلوب بالحضن
وعيون مخيفة وقاسية وعيون كتير
وباحس فيهم كلهم بالحزن
عجبي!!

نسمة ربيع لكن بتكوي الوشوش
طيور جميلة بس من غير عشوش
قلوب بتخفف... إنما وحدها
هي الحياة كدة.. كلها في الفاشوش
عجبي!!